##🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑

प्रतिनिधी :- परमेश्वर कांबळे
मो…8668612357

महावितरण कर्मचाऱ्यांचे धाडस: जुन्नरमध्ये भर पावसात नदी पात्रात उतरून वीजपुरवठा केला सुरळीत

पुणे, दि. २७ जुलै, २०२६: महावितरण कर्मचाऱ्यांच्या कर्तव्यनिष्ठेचे आणि धाडसाचे एक कौतुकास्पद उदाहरण जुन्नर तालुक्यात समोर आले आहे. मुसळधार पाऊस आणि पुराचा धोका असतानाही, वीज कर्मचाऱ्यांनी स्थानिक ग्रामस्थांच्या मदतीने मीना नदीच्या पात्रात उतरून तुटलेल्या वीजवाहिन्या दुरुस्त केल्या आणि वीजपुरवठा यशस्वीपणे सुरळीत केला आहे. महावितरणच्या या कर्तव्य तत्परतेचे सर्वत्र कौतुक होत आहे.

२३ जुलै २०२६ रोजी जुन्नर पश्चिम भागात झालेल्या मुसळधार पाऊस आणि वादळामुळे आपटाळे शाखा कार्यालयांतर्गत येणाऱ्या मौजे सोनावळे (निगळे वस्ती) येथील लघुदाब वाहिनीच्या तारा तुटून थेट मीना नदीच्या पात्रात पडल्या होत्या. नदीला पूर आल्यामुळे आणि पाण्याचा प्रवाह अत्यंत वेगवान असल्याने सुरक्षेचा उपाय म्हणून तात्काळ काम करणे शक्य झाले नव्हते. त्यातच पुढील काही दिवस या भागात सलग पाऊस सुरू असल्याने दुरुस्तीच्या कामात मोठे अडथळे येत होते.

नागरिकांची गैरसोय टाळण्यासाठी आणि वीजपुरवठा लवकरात लवकर पूर्ववत करण्यासाठी आपटाळे शाखेच्या कर्मचाऱ्यांनी रविवारी (२६ जुलै) भर पावसात मोहीम हाती घेतली. पाण्याचा प्रवाह सुरू असतानाही कर्मचाऱ्यांनी स्थानिक ग्रामस्थांच्या सहकार्याने अत्यंत धाडसाने नदी पात्रात प्रवेश केला. वाहत्या पाण्यातून तुटलेल्या तारा बाहेर काढून, त्या व्यवस्थित ओढून रविवारीच या परिसराचा वीजपुरवठा पूर्ववत करण्यात आला. नैसर्गिक आपत्ती आणि आव्हानात्मक परिस्थितीतही महावितरणचे कर्मचारी अखंडित सेवा देण्यासाठी सदैव तत्पर असतात, हेच या घटनेतून पुन्हा एकदा सिद्ध झाले आहे.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)