##🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र…

Crime प्रतिनिधी :- परमेश्वर कांबळे
मो…8668612357..

पिंपरी-चिंचवड शहरात विविध गुन्ह्यांची नोंद: ५ कोटींची खंडणी, अमली पदार्थ जप्तीसह फसवणुकीचे गुन्हे दाखल….

पिंपरी-चिंचवड: – पिंपरी-चिंचवड पोलीस आयुक्तालय कार्यक्षेत्रात १० सप्टेंबर रोजी विविध पोलीस ठाण्यांमध्ये गंभीर स्वरूपाचे गुन्हे दाखल करण्यात आले आहेत. यामध्ये खंडणी उकळणे, फसवणूक, अमली पदार्थ बाळगणे आणि शासकीय कामात अडथळा आणल्याप्रकरणी पोलिसांनी कारवाई सुरू केली आहे.

५ कोटींची खंडणी मागणाऱ्या चौघांना अटक
….
एमआयडीसी भोसरी परिसरात एका कंपनीच्या प्रतिनिधीला माहिती अधिकारातून कागदपत्रे काढल्याचे सांगून व्यवसाय सुरळीत चालू ठेवण्यासाठी तब्बल ५ कोटी रुपयांच्या खंडणीची मागणी करण्यात आली. खंडणी न दिल्यास जीवे ठार मारण्याची धमकी देऊन २५ लाख रुपयांची रोकड स्वीकारताना पोलिसांनी ठाणे येथील राहुल मिश्रा, अल्ताफ जानवेकर, रमेश मांजरेकर आणि सुनिल कानू या चौघांना ताब्यात घेतले आहे.

पिंपळे गुरव येथे १.१४ लाखांचे ‘एमडी’ जप्त

सांगवी पोलिसांनी पिंपळे गुरव येथील पीएमपीएमएल बस स्टॉपजवळ कारवाई करत आर्यन विजय खेडेकर (वय १९) या तरुणाला अटक केली. त्याच्या ताब्यातून १ लाख १४ हजार रुपये किमतीचे ५.७ ग्रॅम मेफेड्रॉन (एमडी) हे अमली पदार्थ जप्त करण्यात आले असून त्याच्यावर एनडीपीएस कायद्यांतर्गत गुन्हा नोंदवला आहे.

ओळखपत्रात फेरबदल करून ४० हजारांची खंडणी……

पुनावळे येथे राहणाऱ्या एका नागरिकाच्या आधारकार्डमधील नावात संमतीशिवाय परस्पर बदल करून फसवणूक करण्यात आली. हे नाव पूर्ववत करण्यासाठी संशयित आरोपी संदीप वर्मा (रा. गुरुग्राम, हरियाणा) याने ४० हजार रुपयांची मागणी करत पैसे न दिल्यास कुटुंबातील सदस्यांच्या ओळखपत्रात बदल करण्याची व जीवे ठार मारण्याची धमकी दिली. याप्रकरणी रावेत पोलीस ठाण्यात गुन्हा दाखल झाला आहे.

३२ लाखांची जमीन फसवणूक….

मोशी बोऱ्हाडेवाडी येथील जमिनीच्या वाटणीत केवळ २.२९ गुंठे जागा वाट्याला येत असताना १६ गुंठे जागा स्वतःच्या मालकीची असल्याचे भासवून एका व्यक्तीची ३२ लाख रुपयांची आर्थिक फसवणूक करण्यात आली. याप्रकरणी भोसरी एमआयडीसी पोलिसांनी चार जणांविरुद्ध गुन्हा नोंदवला आहे.

इतर प्रमुख घटना:….

* ‘आमदार’ लोगो लावून फिरणाऱ्यावर कारवाई: वाकड येथे फॉर्च्यूनर कारवर बेकायदेशीरपणे ‘महाराष्ट्र विधानसभा सदस्य – आमदार’ असा बनावट लोगो लावून फिरणाऱ्या दोघांवर वाकड पोलिसांनी कारवाई केली.

* शासकीय कामात अडथळा: देहूरोड छावणी परिषदेच्या कार्यालयात विनापरवाना प्रवेश करून कनिष्ठ अभियंत्याला दमदाटी व शिवीगाळ करत शासकीय कामात अडथळा निर्माण केल्याप्रकरणी देहूरोड पोलीस ठाण्यात गुन्हा दाखल झाला आहे.

* शाळेत विद्यार्थिनीला मारहाण: पिंपरीतील एका नामांकित शाळेत वर्कबुक न घेतल्याच्या कारणावरून ८ वर्षांच्या विद्यार्थिनीला शिक्षिकेने मारहाण केल्याप्रकरणी संत तुकारामनगर पोलिसात गुन्हा दाखल करण्यात आला आहे.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)