##🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र…

Crime प्रतिनिधी :- परमेश्वर कांबळे
मो…8668612357..

कर्जाचे आमिष दाखवून ‘म्यूल खाती’ उघडणारे रॅकेट उद्ध्वस्त; सायबर पोलिसांकडून गोवा आणि कोलकात्यातून दोघांना अटक…..

पिंपरी-चिंचवड: – सामान्य नागरिकांना कर्ज मिळवून देण्याचे आमिष दाखवून त्यांची बँक खाती सायबर गुन्ह्यांमधील कोट्यवधी रुपयांच्या व्यवहारांसाठी वापरणाऱ्या आंतरराज्य टोळीचा पिंपरी-चिंचवड सायबर पोलिसांनी पर्दाफाश केला आहे. या प्रकरणी पोलिसांनी गोवा आणि कोलकाता येथून दोघांना बेड्या ठोकल्या आहेत.

अटक आरोपींची नावे:
* अभिकेष मोहन आचरेकर (वय ३४, रा. गोवा)
* अनमोल शर्मा (वय ३२, रा. कोलकाता, पश्चिम बंगाल)

गुन्ह्याची पार्श्वभूमी…….

एका खासगी कंपनीतील मॅनेजरला विदेशी शेअर मार्केट, स्टॉक मार्केट आणि आयपीओमध्ये गुंतवणुकीवर तब्बल ५०० टक्के नफा देण्याचे आमिष दाखवण्यात आले होते. या आमिषाला बळी पडून फिर्यादीने तब्बल ८३ लाख ८० हजार रुपये गमावले. तक्रार दाखल झाल्यानंतर सायबर पोलीस ठाण्यात विविध कलमांनुसार गुन्हा नोंदवून तपास सुरू करण्यात आला.
असा लागला छडा तांत्रिक तपासात फिर्यादीच्या खात्यातून ३० लाख रुपये ‘सेंट्रल बँक ऑफ इंडिया’मधील ‘शिवशक्ती एंटरप्रायझेस’ नावाच्या खात्यावर वर्ग झाल्याचे निष्पन्न झाले. हे खाते अभिकेष आचरेकर व प्रतीक्षा नाईक यांच्या भागीदारीतील होते. ठिकाणे बदलणाऱ्या अभिकेषचा शोध घेत असताना तो पुण्याजवळ आल्याची माहिती मिळताच पोलिसांनी खेड शिवापूर येथून त्याला ताब्यात घेतले.

त्याच्या चौकशीतून मिळालेल्या माहितीच्या आधारे पोलिसांनी कोलकात्यात जाऊन स्थानिक पोलिसांच्या मदतीने अनमोल शर्मा याला अटक केली.

६० ते ७० बँक खात्यांचा वापर..

तपासात धक्कादायक माहिती समोर आली आहे. आरोपी अभिकेष आचरेकर हा गोव्यातील सामान्य नागरिकांना (विशेषतः महिलांना) कर्ज देण्याचे आमिष दाखवून त्यांच्या कागदपत्रांवरून बँक खाती उघडून घेत असे. अशी सुमारे ६० ते ७० ‘म्यूल बँक खाती’ अनमोल शर्मा व इतर साथीदारांना पुरवून सायबर फसवणुकीतील कोट्यवधी रुपयांची रक्कम वळती केली जात होती. आरोपी हे पुणे शहर आणि राजस्थान येथील गुन्ह्यांतही पोलिसांना पाहिजे होते.

ही कामगिरी पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, पोलीस उपआयुक्त (गुन्हे) रोहिदास पवार, सहायक पोलीस आयुक्त रोहिणी बानकर यांच्या मार्गदर्शनाखाली वरिष्ठ पोलीस निरीक्षक रविकिरण नाळे, पोलीस निरीक्षक दिगंबर गायकवाड, सहायक पोलीस निरीक्षक प्रविण स्वामी, पोलीस उपनिरीक्षक प्रकाश कातकाडे व पथकाने केली.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)