##🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र…

Crime प्रतिनिधी :- परमेश्वर कांबळे
मो…8668612357

स्टार बाझारमधून महागड्या वस्तू चोरणारी आंतरजिल्हा टोळी गजाआड; चार महिलांसह सात जणांना अटक, ७.२१ लाखांचा मुद्देमाल जप्त…

पिंपरी-चिंचवड: मॉल्स आणि सुपरमार्केटमधील महागड्या खाद्यवस्तूंची चोरी करणाऱ्या एका सराईत टोळीचा वाकड पोलिसांनी पर्दाफाश केला आहे. वाकड येथील ‘स्टार बाझार’मधून काजू, बदाम आणि तुपाचे पाऊच चोरणाऱ्या या टोळीतील चार महिला व तीन पुरुष अशा एकूण सात जणांना अटक करण्यात आली असून, त्यांच्याकडून गुन्ह्यात वापरलेल्या वाहनांसह ७ लाख २१ हजार ९६० रुपयांचा मुद्देमाल हस्तगत करण्यात आला आहे.
वाकड परिसरातील दत्त मंदिर रोड व कलाटे वस्ती येथील ‘स्टार बाझार’मधून ऑगस्ट महिन्यात सुमारे ४२ हजार १०० रुपये किमतीचे काजू, बदाम व गोवर्धन तुपाचे पाऊच चोरीला गेले होते. याप्रकरणी वाकड पोलीस ठाण्यात भारतीय न्याय संहितेनुसार गुन्हा दाखल करण्यात आला होता.

तपास पथकाने परिसरातील सीसीटीव्ही फुटेज आणि तांत्रिक विश्लेषणाच्या आधारे संशयित इनोव्हा कारचा माग काढला. ही कार मुंबईला जाऊन पुन्हा पिंपरी-चिंचवडच्या दिशेने आल्याचे समजताच पोलिसांनी ताथवडे-वाकड परिसरात सापळा रचून इनोव्हा कार व एका ऑटो रिक्षासह सात संशयितांना ताब्यात घेतले. सखोल चौकशीत आरोपींनी गुन्ह्याची कबुली दिली.
अटक करण्यात आलेले आरोपी:
* रविकांत देवानंद जाकरे (वय ३२, रा. जोगेश्वरी पूर्व, मुंबई; मूळ रा. देगलूर, नांदेड)
* ब्रिजेश सिताराम मदेशिया (वय २७, रा. जोगेश्वरी ईस्ट, मुंबई)
* ब्रिजेश बाळू यादव (वय ३७, रा. जोगेश्वरी वेस्ट, मुंबई)
* सोनम बाबु शेख (वय ३७, रा. जोगेश्वरी पूर्व, मुंबई; मूळ रा. देगलूर, नांदेड)
* सलमा शकिल शेख (वय ७१, रा. बालाजी नगर, भोसरी, पुणे)
* सानिया बाबुमिया शेख (वय २०, रा. जोगेश्वरी ईस्ट, मुंबई)
* रूमा ब्रिजेश मदेशिया (वय २७, रा. जोगेश्वरी ईस्ट, मुंबई)
अनेक गुन्ह्यांची उकल
आरोपींकडे केलेल्या तपासात त्यांनी पिंपरी व चिखली पोलीस ठाण्याच्या हद्दीतील स्टार बाझारमधील चोऱ्यांचीही कबुली दिली. याशिवाय काटे पिंपळे आणि केसनंद फाटा (वाघोली, पुणे) येथील स्टार बाझारमधूनही अशाच पद्धतीने माल चोरल्याचे निष्पन्न झाले आहे. पोलिसांनी आरोपींकडून चोरीचा सर्व माल आणि गुन्ह्यात वापरलेली वाहने असा एकूण ७,२१,९६० रुपयांचा मुद्देमाल पूर्णतः जप्त केला आहे.
सदर टोळी रेकॉर्डवरील सराईत गुन्हेगारांची असून त्यांनी पुणे, मुंबई, पिंपरी-चिंचवडसह महाराष्ट्रातील इतर शहरांतही अशा चोऱ्या केल्याचा संशय आहे. ही कारवाई पिंपरी-चिंचवड पोलीस आयुक्त विनय कुमार चौबे, सह आयुक्त डॉ. शशीकांत महावरकर, अपर पोलीस आयुक्त सारंग आवाड, बसवराज तेली, पोलीस उप-आयुक्त प्रदिप जाधव, सहायक पोलीस आयुक्त सुनिल कुराडे यांच्या मार्गदर्शनाखाली वरिष्ठ पोलीस निरीक्षक विठ्ठल साळुंखे, सपोनि श्रीनिवास दराडे व तपास पथकाने केली.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)