##🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र…

Crime प्रतिनिधी :- परमेश्वर कांबळे
मो…8668612357

‘कंपनीच्या मालकाचे बनावट व्हॉट्सॲप बनवून २.२० कोटींची फसवणूक; ‘बॉस स्कॅम’ उघडकीस, पिंपरी-चिंचवड सायबर पोलिसांकडून तिघांना अटक
पिंपरी चिंचवड:

एका नामांकित ऑटो शोरूम कंपनीच्या मालकाचा फोटो आणि नाव वापरून बनावट व्हॉट्सॲप अकाऊंट तयार करत तब्बल २ कोटी २० लाख रुपयांची फसवणूक केल्याचा धक्कादायक प्रकार समोर आला आहे. या ‘बॉस स्कॅम’ प्रकरणी पिंपरी-चिंचवड सायबर पोलिसांनी तांत्रिक विश्लेषण करत तीन आरोपींना बेड्या ठोकल्या आहेत.
अशी झाली फसवणूक
१४ ऑगस्ट २०२६ रोजी फिर्यादी यांच्या ऑटो शोरूममधील अकाऊंट एक्झिक्युटिव्हला एका व्हॉट्सॲप क्रमांकावरून मेसेज आला. त्यावर कंपनीच्या मालकाचे नाव व डीपी (प्रोफाइल फोटो) असल्याने त्यांनी विश्वास ठेवून आधी कंपनीच्या खात्यातील शिल्लक रक्कम सांगितली. त्यानंतर सायबर भामट्यांनी विविध बँक खाती पाठवून त्यावर एकूण २ कोटी २० लाख रुपये वर्ग करण्यास सांगितले. आरोपींकडून सतत पैशांची मागणी वाढत असल्याने संशय आला आणि कर्मचाऱ्याने थेट मालकाशी संपर्क साधला असता, अशी कोणतीही मागणी केली नसल्याचे उघड झाले. त्यानंतर कंपनीच्या वतीने सायबर पोलीस ठाण्यात गुन्हा दाखल करण्यात आला.
अटक आरोपींची नावे
* संचय पराग चव्हाण (वय २० वर्षे, रा. डोंबिवली ईस्ट, मुंबई)
* रमेश कुमार शंकरलालजी पुनीया (वय २४ वर्षे, सध्या रा. पनवेल; मूळ रा. जोधपूर, राजस्थान)
* प्रकाश गोरधनराम पंवार (वय २० वर्षे, सध्या रा. पनवेल; मूळ रा. जोधपूर, राजस्थान)
तपास आणि कारवाई
सायबर पोलिसांनी तांत्रिक तपास करत पैसे वर्ग झालेल्या आयडीबीआय बँकेच्या खात्यावरून प्रथम संचय चव्हाण याला ताब्यात घेतले. त्याच्या चौकशीत तो नोकरीच्या शोधात असताना पनवेल येथे गॅस दुरुस्तीचे काम करणाऱ्या रमेश कुमार आणि प्रकाश पंवार यांच्या संपर्कात आल्याचे स्पष्ट झाले. या दोघांनी संचय याच्याकडून ५ बँक खाती मिळवून त्याद्वारे फसवणुकीचे व्यवहार केले व काही रक्कम धनादेश आणि एटीएमद्वारे रोख काढून घेतली होती. पोलिसांनी पनवेल परिसरातील गॅस एजन्सींचा शोध घेऊन या दोघांनाही अटक केली.
सदर कारवाई पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, पोलीस उपआयुक्त (गुन्हे) रोहिदास पवार आणि सहायक पोलीस आयुक्त रोहिणी बानकर यांच्या मार्गदर्शनाखाली वरिष्ठ पोलीस निरीक्षक रविकिरण नाळे, पोलीस निरीक्षक दिगंबर गायकवाड, सपोनि प्रवीण स्वामी, पोउपनि सागर पोमण व सायबर पथकाने केली.
पोलिसांचे नागरिकांना आवाहन
कंपनीचे वरिष्ठ अधिकारी, सीईओ किंवा मालक यांच्या नावाने अथवा डीपी वापरून व्हॉट्सॲपवर पैशांची मागणी झाल्यास थेट खात्री केल्याशिवाय कोणतेही आर्थिक व्यवहार करू नका. तसेच संशयास्पद झिप (ZIP) फाईल किंवा एपीके (APK) फाईल डाऊनलोड करू नका, असे आवाहन पिंपरी-चिंचवड सायबर पोलिसांनी केले आहे.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)