##🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र…

प्रतिनिधी :- परमेश्वर कांबळे
मो…8668612357
‘हाऊसफुल्ल’ तुकाराम मुंढे : ‘भेसळमुक्त महाराष्ट्राचा निर्धार’
पिंपरी : राज्याच्या अन्न व औषध प्रशासन विभागाचे आयुक्त तुकाराम मुंढे यांच्या प्रकट मुलाखतीच्या कार्यक्रमाला पिंपरी-चिंचवडकरांनी तुडुंब प्रतिसाद दिला. दिशा सोशल फाउंडेशनच्या वतीने शनिवारी (२२ ऑगस्ट) चिंचवड येथील प्रा. रामकृष्ण मोरे नाट्यगृहात या कार्यक्रमाचे आयोजन करण्यात आले होते. ‘भेसळमुक्त महाराष्ट्र, आरोग्यदायी महाराष्ट्र’ हा विषय केंद्रस्थानी ठेवून ज्येष्ठ पत्रकार मयुरेश कोण्णूर यांनी तुकाराम मुंढे यांच्याशी मनमोकळा संवाद साधला. या मुलाखतीत मुंढे यांनी अन्नातील भेसळ, नागरिकांची जबाबदारी, नैतिकता, प्रशासनातील कार्यपद्धती आणि कर्तव्याचे महत्त्व यावर परखड मते मांडली.
मुलाखतीतील महत्त्वाचे मुद्दे :
* विचारांची भेसळ घातक : ज्ञान आणि माहितीच्या बाबतीत आपण जितके सजग असतो, तितके अन्नपदार्थांच्या बाबतीत नसतो. माणसाने शरीरानेच नव्हे, तर वैचारिकदृष्ट्याही निरोगी असायला हवे. पदार्थांप्रमाणेच विचारांची भेसळही घातक असते.
* ‘रील’ऐवजी ‘रियालिटी’ पाहा : आजच्या डिजिटल युगात अल्गोरिदममुळे माहितीची दुसरी बाजू समोर येत नाही. थेट लाईक आणि फॉरवर्ड करण्यापूर्वी विचार केला पाहिजे. नवीन पिढीने सोशल मीडियावरील ‘रील’ऐवजी ‘रियालिटी’ काय आहे, हे समजून घेतले पाहिजे.
* नैतिकतेशी तडजोड नको : परिस्थिती हलाखीची असली तरी नैतिकतेशी तडजोड करणे योग्य नाही. गरिबी हे चुकीचा मार्ग निवडण्याचे कारण ठरू शकत नाही. बौद्धिक प्रामाणिकपणा नसेल तर मिळणारे यश अल्पजीवी असते.
* दडपणाची भीती नाही : नियम हे केवळ बंधन नसून लोकहित साधण्याचे माध्यम आहेत. सत्याचा स्वीकार आणि पारदर्शक कारभार ही आई-वडील व भावाची शिकवण असल्याने बदल्या किंवा दबावाची कधी भीती वाटत नाही.
‘सचिन तेंडुलकरच्या भावापेक्षा माझा भाऊ खूप मोठा!’
पिंपरी पालिकेत उल्लेखनीय कामगिरी केलेले सेवानिवृत्त उपजिल्हाधिकारी अशोक मुंढे यांचा यावेळी महापौर रवी लांडगे यांच्या हस्ते विशेष सन्मान करण्यात आला. आपल्या भावाचा गौरव करताना तुकाराम मुंढे म्हणाले, “सचिन तेंडुलकरच्या भावापेक्षा माझा भाऊ खूप मोठा आहे.” त्यांच्या या वक्तव्यावर सभागृहात टाळ्यांचा कडकडाट झाला.
गुणवंतांचा गौरव :
कार्यक्रमात ‘नीट यूजी २०२६’ परीक्षेत राज्यात प्रथम आलेली श्रावणी कुदळे, जागतिक शूटिंग स्पर्धेतील रौप्यपदक विजेती शौर्या भरणे आणि शिष्यवृत्ती परीक्षेत राज्यात प्रथम आलेला क्षितीजय नप्ते यांचा तुकाराम मुंढे यांच्या हस्ते सत्कार करण्यात आला.
कार्यक्रमादरम्यान प्रेरणा शिक्षण संस्थेची विद्यार्थिनी महक जहागिरदार हिने भाषण केले. पत्रकार शफी पठाण लिखित ‘तुकाराम’ या पुस्तकाचे अभिवाचन श्रीकांत चौगुले यांनी केले. प्रास्ताविक नाना शिवले यांनी केले, तर सानिका कांबळे यांनी आभार मानले.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)