## 🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑

क्राईम रिपोर्टर :- परमेश्वर कांबळे- मो..8668612357

# जागेचा वाद मिटवण्याच्या बहाण्याने २५ हजारांची फसवणूक; निगडी पोलिसांत तक्रार दाखल…

**पिंपरी-चिंचवड:** शेतजमिनीचा रस्ता आणि जागेचा वाद मिटवून देण्याचे खोटे आश्वासन देऊन एक महिला आणि तिच्या कुटुंबाकडून २५,००० रुपये रोख घेऊन फसवणूक केल्याचा प्रकार उघडकीस आला आहे. या प्रकरणी ललिता दलिंग काळे (रा. कोंढवा, पुणे) यांनी निगडी पोलीस ठाण्यात नामदेवराव निवृत्ती जाधव यांच्याविरोधात गुन्हा दाखल करण्याची मागणी करणारा अधिकृत तक्रार अर्ज दिला आहे.
मिळालेल्या माहितीनुसार, तक्रारदार ललिता काळे यांच्या गट क्रमांक ५६, मौजे दिंडोर (ता. दक्षिण सोलापूर, जि. सोलापूर) येथील शेतजमिनीबाबत बेकायदेशीर रस्ता काढण्याचा वाद सुरू होता. दरम्यान, संशयित आरोपी नामदेवराव जाधव यांचा फेसबुकवरील व्हिडिओ पाहून तक्रारदारांनी त्यांच्याशी फोनवरून संपर्क साधला. जाधव यांनी हा वाद मार्गी लावण्याचे आश्वासन देत २५,००० रुपयांची मागणी केली.

**हॉटेलमध्ये स्वीकारली रोकड*

४ मार्च २०२६ रोजी दुपारी १२ ते १ च्या दरम्यान निगडी प्राधिकरण (पिंपरी-चिंचवड) येथील ‘ब्रह्मावेज हॉटेल’मध्ये तक्रारदारांना बोलवण्यात आले. तेथे जाधव यांनी स्वतः २५,००० रुपयांची रोकड स्वीकारली आणि काम लवकरात लवकर करण्याचे आश्वासन दिले.

**कामही नाही अन् पैसेही बुडवले!**

पैसे घेतल्यानंतर तक्रारदारांनी कामाबाबत वारंवार विचारणा केली असता, जाधव यांनी वेगवेगळी कारणे सांगून वेळकाढूपणा केला. आजतागायत कोणतेही काम न करता घेतलेली रक्कमही परत केली नाही. उलट, वारंवार मानसिक त्रास देऊन विश्वासघात केल्याचे तक्रार अर्जात नमूद करण्यात आले आहे.
पैसे उकळण्याच्या हेतूनेच खोटे आश्वासन देऊन आर्थिक फसवणूक केल्याप्रकरणी भारतीय न्याय संहितेच्या (BNS) तरतुदींनुसार गुन्हा दाखल करून कठोर कायदेशीर कारवाई करावी, अशी मागणी ललिता काळे यांनी पोलिसांकडे केली आहे. निगडी पोलिसांनी या संदर्भातील तक्रार अर्ज स्वीकारला असून पुढील चौकशी सुरू आहे.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)