## 🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑

घरकुलवासीयांचा महापालिकेवर जनआक्रोश; प्रलंबित नागरी प्रश्नांवर आयुक्त कार्यालयावर धडक मोर्चा…

प्रतिनिधी : परमेश्वर कांबळे..

पिंपरी | दि. १५ जुलै घरकुल परिसरातील गेल्या अनेक वर्षांपासून प्रलंबित असलेल्या मूलभूत नागरी सुविधांच्या प्रश्नांवर तातडीने कायमस्वरूपी तोडगा काढावा, या प्रमुख मागणीसाठी घरकुल परिसरातील नागरिकांनी बुधवारी पिंपरी-चिंचवड महानगरपालिका आयुक्त कार्यालयावर भव्य जनआक्रोश मोर्चा काढला. या मोर्चात महिला, ज्येष्ठ नागरिक, युवक तसेच भाजी मंडई धारक मोठ्या संख्येने सहभागी झाले होते.

मोर्चाचे नेतृत्व मारुती गणपत जाधव यांनी केले. आंदोलनानंतर महापालिका प्रशासनाला सविस्तर निवेदन सादर करण्यात आले. निवेदनात घरकुल परिसरातील गेल्या १२ वर्षांपासून प्रलंबित असलेल्या विविध नागरी समस्यांवर तातडीने कायमस्वरूपी उपाययोजना करण्याची मागणी करण्यात आली.

निवेदनात एसटीपीचे दूषित पाणी घरकुल परिसरात येणे कायमस्वरूपी बंद करणे, अनेक वर्षांपासून बंद असलेली भाजी मंडई सुरू करणे, अपूर्ण सांस्कृतिक भवन नागरिकांसाठी खुले करणे, व्यायामशाळा सुरू करणे, अंगणवाडी व शैक्षणिक सुविधा उपलब्ध करून देणे, मुख्य प्रवेशद्वारावर कायमस्वरूपी सुरक्षा रक्षक नेमणे, स्टॉर्म वॉटर लाईनची नियमित स्वच्छता व दुरुस्ती करणे, शुद्ध पिण्याच्या पाण्याचा प्रश्न मार्गी लावणे तसेच घरकुल परिसरासाठी विशेष विकास कृती आराखडा जाहीर करणे आदी प्रमुख मागण्यांचा समावेश होता.

यावेळी काँग्रेसचे नेते सोमनाथ शेळके, सुग्रीव पाटील, सुरेश वैरागर, रमेश शिंदे, संजय तळेकरी, सुरज देशमाने, दत्तात्रय डोके, तानाजी हावळे, संदीप रोकडे, दिपक कांबळे, सुधाकर कदम, संग्राम पवार, नानासाहेब वाघमारे, वर्षा खरात, सविता डोंगरे, महेश खंदारे, विकास गायकवाड, वैभव माळशिरस, लताताई माने, गणेश शेंगदाणे, विजय गेडाम, संगीता वाघमारे, गणपत जाधव, सुशांत बनसोडे, गणेश देवगिरे यांच्यासह घरकुल परिसरातील नागरिक मोठ्या संख्येने उपस्थित होते.

आंदोलनकर्त्यांनी प्रशासनाला स्पष्ट इशारा देत सांगितले की, वारंवार निवेदने देऊनही प्रश्नांकडे दुर्लक्ष होत असल्याने नागरिकांमध्ये तीव्र नाराजी आहे. प्रशासनाने निश्चित कालमर्यादेत ठोस निर्णय घेऊन विकासकामांना सुरुवात न केल्यास यापेक्षा तीव्र लोकशाही मार्गाने आंदोलन छेडण्यात येईल.

मोर्चादरम्यान कायदा व सुव्यवस्था अबाधित राहावी यासाठी पोलीस बंदोबस्त तैनात करण्यात आला होता. संपूर्ण आंदोलन शांततापूर्ण वातावरणात पार पडले.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)