## 🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑

प्रतिनिधी:- परमेश्वर कांबळे

# 📰 कृष्णानगर स्पाईन रोडवर कचऱ्याचा नवीन डेपो? मोशी दुर्घटनेनंतर नागरिक संतापले; तातडीने हटविण्याची मागणी…

**पिंपरी-चिंचवड:** मोशी येथील कचरा डेपोमध्ये घडलेल्या दुर्दैवी दुर्घटनेनंतर पिंपरी-चिंचवड प्रशासनाने शहरात निर्माण झालेली कचऱ्याची कोंडी फोडण्यासाठी नवा मार्ग शोधल्याचा आरोप होत आहे. शहरातील मोठ्या प्रमाणातील कचरा आता कृष्णानगर स्पाईन रोड परिसरात आणून टाकला जात असल्याचा गंभीर आरोप स्थानिक नागरिकांनी केला आहे. गेल्या पाच दिवसांपासून सुरू असलेल्या या प्रकारामुळे कृष्णानगर, महात्मा फुलेनगर, भीमशक्ती नगर, मोरे वस्ती या दाट लोकवस्तीच्या परिसरातील नागरिकांचे जनजीवन पूर्णपणे विस्कळीत झाले आहे.

### 😷 आरोग्याचा प्रश्न ऐरणीवर; नागरिक धास्तावले…

स्थानिक रहिवाशांनी दिलेल्या माहितीनुसार, स्पाईन रोड परिसरामध्ये कचऱ्याचे ढीग दिवसेंदिवस वाढत आहेत. यामुळे परिसरात प्रचंड दुर्गंधी पसरली असून माशा, डास आणि प्रदूषणामुळे नागरिकांचे आरोग्य धोक्यात आले आहे. विशेष म्हणजे या परिसरात शाळा, रुग्णालये तसेच हजारो नागरिकांची दाट वस्ती आहे. अशा संवेदनशील भागात कचरा टाकला जात असल्याने संसर्गजन्य आजार व मोठी रोगराई पसरण्याची भीती नागरिकांकडून व्यक्त केली जात आहे.

मोशी येथील दुर्घटनेत अनेक कर्मचाऱ्यांचा दुर्दैवी मृत्यू झाल्यानंतर, प्रशासनाने त्यातून धडा न घेता उलट लोकवस्तीच्या मध्यभागी नवीन कचरा संकलन केंद्र उभारण्यास सुरुवात केल्याचा आरोप नागरिकांनी केला आहे. यामुळे संपूर्ण परिसरात तीव्र संताप आणि भीतीचे वातावरण निर्माण झाले आहे.

### 📢 आंदोलनाचा इशारा आणि चौकशीची मागणी…

या गंभीर समस्येची दखल घेत राष्ट्रवादी काँग्रेस पार्टीचे मारुती गणपत जाधव यांनी प्रशासनाला धारेवर धरले आहे. “प्रशासनाने नागरिकांच्या जिवाशी चालवलेला हा खेळ तात्काळ थांबवावा. हा कचरा तातडीने इतर सुरक्षित ठिकाणी हलवून नागरिकांना दिलासा द्यावा,” अशी जोरदार मागणी त्यांनी केली आहे. तसेच, लोकवस्तीत कचरा टाकण्याची परवानगी देणाऱ्या संबंधित अधिकाऱ्यांची चौकशी करून त्यांच्यावर जबाबदारी निश्चित करावी, असेही ते म्हणाले
.
### 📝 उपमुख्यमंत्र्यांकडे धाव घेणार…

याप्रकरणी स्थानिक नागरिकांच्या शिष्टमंडळासह लवकरच राज्याच्या उपमुख्यमंत्री सौ. सुनेत्रा ताई पवार यांची भेट घेऊन त्यांना सविस्तर निवेदन सादर करण्यात येणार आहे. प्रशासनाने जर हा प्रकार तात्काळ थांबवला नाही, तर नागरिकांच्या आरोग्यासाठी आणि हक्कासाठी लोकशाही मार्गाने तीव्र आंदोलन छेडण्यात येईल, असा इशारा मारुती गणपत जाधव यांनी दिला आहे.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)