NEET पेपरफुटीचे ‘पुणे कनेक्शन’ उघड; ब्युटी पार्लर चालवणाऱ्या महिलेला बेड्या, डॉक्टर एजंटचेही कारस्थान उजेडात

पुणेNEET पेपरफुटीचे ‘पुणे कनेक्शन’ उघड; ब्युटी पार्लर चालवणाऱ्या महिलेला बेड्या, डॉक्टर एजंटचेही कारस्थान उजेडात वैद्यकीय प्रवेश परीक्षेच्या (NEET) पेपरफुटी प्रकरणाचा तपास आता निर्णायक टप्प्यावर पोहोचला आहे. पुणे पोलिसांनी आज पहाटे मोठी कारवाई करत वाघोली परिसरातून मनीषा वाघमारे नावाच्या महिलेला ताब्यात घेतले आहे. मनीषा ही ब्युटी पार्लर चालवण्याच्या आडून विद्यार्थ्यांना मुख्य एजंटपर्यंत पोहोचवण्याचे काम करत असल्याचा खळबळजनक संशय व्यक्त केला जात आहे. ​मध्यस्थाची भूमिका: मनीषा वाघमारे ही परीक्षार्थी विद्यार्थ्यांना गाठून त्यांना मुख्य आरोपी धनंजय लोखंडेपर्यंत पोहोचवायची. ती या रॅकेटमधील एक महत्त्वाचा दुवा असल्याचे मानले जात आहे. ​डिजिटल पुरावे जप्त: पोलिसांनी मनीषाकडून मोबाईल आणि लॅपटॉप जप्त केला आहे. यामध्ये संशयास्पद व्हॉट्सअ‍ॅप कॉल्स आणि चॅट्स सापडले असून, त्यातून पेपरफुटीचे मोठे जाळे उघड होण्याची शक्यता आहे. ​CBI कडे तपास सोपवणार: पुणे गुन्हे शाखेने ही कारवाई केली असून, आज सायंकाळपर्यंत मनीषाला पुढील तपासासाठी सीबीआयच्या (CBI) ताब्यात दिले जाणार आहे. ​या प्रकरणातील दुसरा मोठा मासा म्हणजे धनंजय लोखंडे. मूळचा राहुरी (अहिल्यानगर) येथील असलेला २६ वर्षीय धनंजय हा पेशाने डॉक्टर (BAMS) आहे. त्याच्या अटकेनंतर धक्कादायक माहिती समोर आली आहे: धनंजयने मंगळुरू येथून बी.ए.एम.एस. पूर्ण केले आहे. त्याचे वडील शालेय लिपिक तर भाऊ स्वतः डॉक्टर आहे.
​ गेल्या चार वर्षांपासून पुण्याच्या वाघोली भागात प्रॅक्टिस करत असतानाच, तो मेडिकल ॲडमिशनसाठी ‘कन्सल्टन्सी’ चालवत होता. याच्याच माध्यमातून तो पेपरफुटीच्या रॅकेटमध्ये सक्रिय झाला. नाशिकच्या शुभम खैरनारच्या अटकेनंतर धनंजयचे नाव समोर आले. सीबीआयने सापळा रचून त्याला राहुरीतून रात्री उशिरा अटक केली. ​पुणे आणि पश्चिम महाराष्ट्रात या रॅकेटचे जाळे किती मोठे आहे, याचा शोध आता सीबीआय घेत आहे. मनीषा वाघमारे आणि धनंजय लोखंडे यांच्या चौकशीतून या रॅकेटमध्ये आणखी किती बडे डॉक्टर्स, एजंट किंवा शिक्षण संस्थांचे पदाधिकारी सामील आहेत, याचा उलगडा होण्याची शक्यता आहे. या कारवाईमुळे शैक्षणिक वर्तुळात मोठी खळबळ उडाली असून पालकांमध्येही चिंतेचे वातावरण आहे