क्राईम रिपोर्टर :- परमेश्वर कांबळे
मो…8668612357

पिंपरी-चिंचवड आयुक्तालयात एकाच दिवसात गुन्ह्यांचा उच्चांक; चोरी, मारहाण, सायबर फसवणूक व पिटा कायद्यान्वये धडक कारवाई

पिंपरी-चिंचवड : पिंपरी-चिंचवड पोलीस आयुक्तालयाच्या हद्दीत दिनांक १० ऑगस्ट २०२६ रोजी गुन्हेगारीच्या विविध घटना उघडकीस आल्या आहेत. यात वाहनांची तोडफोड, जिवे मारण्याची धमकी, सायबर फसवणूक, अवैध शस्त्र बाळगणे आणि पिटा कायद्यांतर्गत (PITA) वेश्याव्यवसायाविरुद्ध केलेल्या कारवाईचा समावेश असून, पोलिसांनी विविध पोलीस ठाण्यांत गंभीर गुन्हे दाखल केले आहेत.

१. कारची तोडफोड व जबरी चोरी (वाकड पोलीस ठाणे)

थेरगाव येथील आनंद हॉस्पिटल शेजारी पार्क केलेल्या इर्टिका कारची (MH 12 YQ 3041) पाठीमागील काच पेव्हर ब्लॉक व कोयत्याने फोडून नुकसान करण्यात आले. तसेच फिर्यादी वैभव आनंदराव नळगिरे यांना अडवून आरोपींनी कोयत्याचा धाक दाखवत त्यांच्या खिशातील १,५०० रुपये बळकावले. याप्रकरणी नीरज हकीम सोळंकी आणि सूरज हकीम सोळंकी यांच्याविरुद्ध वाकड पोलीस ठाण्यात गुन्हा दाखल करण्यात आला आहे.

२. अल्पवयीन मुलीला आत्महत्येस प्रवृत्त केल्याप्रकरणी गुन्हा (देहुरोड पोलीस ठाणे)

देहूगाव परिसरातील एका १७ वर्षीय अल्पवयीन मुलीला प्रेमाच्या जाळ्यात फसवून, वारंवार संशय घेऊन व मानसिक त्रास दिल्यामुळे तिने घरातील पत्र्याच्या लोखंडी अँगला साडीने गळफास घेऊन आत्महत्या केली. या प्रकरणी फिर्यादी योगिता संतोष धरणे यांच्या तक्रारीवरून साहिल हनुमंत दणाणे याच्याविरुद्ध देहुरोड पोलीस ठाण्यात आत्महत्येस प्रवृत्त केल्याप्रकरणी गुन्हा दाखल करण्यात आला आहे.

३. APK फाईल डाउनलोड करण्यास सांगून ६ लाख ७० हजारांची सायबर फसवणूक (सांगवी पोलीस ठाणे)

पिंपळे गुरव येथील ६१ वर्षीय सेवानिवृत्त नागरिकाला ऑनलाईन पद्धतीने ‘EMISÉO’ डेट चेंज करण्यासाठी APK फाईल डाउनलोड करण्यास सांगून सायबर चोरट्यांनी त्यांचा विश्वास संपादन केला. त्यानंतर त्यांच्या बँक खात्यातून अप्रामाणिकपणे ६,७०,००० रुपयांची रक्कम परस्पर काढून फसवणूक केली. याप्रकरणी सांगवी पोलीस ठाण्यात गुन्हा नोंदवण्यात आला असून पोलीस अधिक तपास करत आहेत.

४. अवैध शस्त्र बाळगणाऱ्यांवर पोलिसांची कारवाई (आळंदी व चाकण उत्तर पोलीस ठाणे)

पिंपरी-चिंचवड पोलीस आयुक्तांच्या प्रतिबंधात्मक आदेशाचे उल्लंघन करून विनापरवाना लोखंडी कोयता बाळगल्याप्रकरणी कारवाई करण्यात आली आहे. चोहोली खुर्द (ता. खेड) येथे पंकज हनुमंत कांबळे याच्याकडून, तर चाकणमधील चक्रेश्वर रोड परिसरात कृष्णा सुनील भंडलकर याच्याकडून लोखंडी कोयते जप्त करण्यात आले असून त्यांच्यावर आळंदी आणि चाकण उत्तर पोलीस ठाण्यात शस्त्र अधिनियम व महाराष्ट्र पोलीस कायद्यान्वये गुन्हे दाखल करण्यात आले आहेत.

५. अंमली पदार्थ विरोधी पथकाची कारवाई; १ लाखाचा गांजा जप्त (बावधन पोलीस ठाणे)

भुगाव (ता. मुळशी) येथील पदेमावती हॉटेलसमोर विनापरवाना विक्रीसाठी बेकायदेशीररीत्या कब्जात बाळगलेला १ लाख रुपये किमतीचा तब्बल १,९९२ ग्रॅम वजनाचा गांजा हा अंमली पदार्थ पोलिसांनी जप्त केला. याप्रकरणी मुख्य आरोपी रूपेश गोपाल शेट्टी याला अटक करण्यात आली असून, कृष्णा साखरे याच्यासह दोघांवर बावधन पोलीस ठाण्यात एनडीपीएस (NDPS) कायद्यान्वये गुन्हा दाखल करण्यात आला आहे.

६. अनैतिक व्यापाराविरुद्ध (PITA) धडक कारवाई

किवळे येथील जुना मुंबई-पुणे हायवेवरील सर्व्हिस रोडवर आणि दिघी येथील मॅग्झीन चौक परिसरात सार्वजनिक शिष्टाचाराचा भंग करून वेश्याव्यवसायाच्या उद्देशाने अश्लील हावभाव करणाऱ्या महिलांवर अनैतिक मानवी वाहतूक प्रतिबंधक कक्ष व दिघी पोलिसांनी धडक कारवाई केली आहे. या प्रकरणी देहुरोड व दिघी पोलीस ठाण्यांत संबंधित कायद्यान्वये गुन्हे नोंदविण्यात आले आहेत.

७. जमिनीचा ताबा व कंपाउंड मारण्याच्या वादातून मारहाण (चाकण उत्तर पोलीस ठाणे)

भोसे (ता. खेड) येथील जमीन गट नंबर ८२२ मध्ये जमिनीस कंपाउंड मारत असताना ताबा व हक्काच्या कारणावरून दोन गटात वाद झाला. यात फिर्यादी सुलाबाई नामदेव बोऱ्हाडे व त्यांच्या कुटुंबीयांना लाकडी दांडक्याने व हाताने मारहाण करून जीवे मारण्याची धमकी देण्यात आली. याप्रकरणी चाकण उत्तर पोलीस ठाण्यात चार जणांविरुद्ध गुन्हा दाखल करण्यात आला आहे.

८. वाहन चोरी व अपघात प्रकरणे

• चिखली: कुदळवाडी परिसरात रोडच्या कडेला पार्क केलेली २०,००० रुपये किमतीची स्प्लेंडर मोटारसायकल (MH 14 KH 1729) अज्ञात चोरट्याने लांबवली. याप्रकरणी चिखली पोलीस ठाण्यात चोरीचा गुन्हा नोंदवला आहे.
• वाकड: कस्पटे चौकात भरधाव वेगाने जाणाऱ्या अज्ञात कारच्या चालकाने चालकाचे नियंत्रण सुटल्याने चालत असलेल्या पायी नागरिकाला जोरदार धडक दिली, ज्यामुळे फिर्यादीच्या वडिलांचा पाय फॅक्चर झाला. घटनास्थळावरून न थांबता पळून गेलेल्या अज्ञात वाहनचालकाविरुद्ध वाकड पोलीस ठाण्यात गुन्हा दाखल करण्यात आला आहे.