##🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑

क्राईम रिपोर्टर :- परमेश्वर कांबळे
मो…8668612357

## घरफोडी करून ४ महिने पोलिसांना गुंगारा देणारे चोरटे गजाआड; मुंबई व बंगळुरूमधून अटक, १४ तोळे सोने जप्त.

**महाळुंगे (पिंपरी-चिंचवड):**महाळुंगे इंगळे (ता. खेड, जि. पुणे) येथील एका भाजीविक्रेत्याच्या बंद दुकानाचे शटर उचकटून कपाटातील सोन्याचे दागिने चोरून नेणाऱ्या आंतरराज्यीय टोळीचा उत्तर महाळुंगे एमआयडीसी पोलिसांनी पर्दाफाश केला आहे. सलग चार महिने पोलिसांना चकवा देणाऱ्या मुख्य आरोपींसह त्याच्या साथीदारांना मुंबई आणि बंगळुरू येथून ताब्यात घेण्यात आले असून, त्यांच्याकडून तब्बल १२ लाख ६० हजार रुपये किमतीचे १४ तोळे सोन्याचे दागिने जप्त करण्यात आले आहेत.

### **नेमकी घटना काय?**

मौजे महाळुंगे इंगळे येथे राहणाऱ्या सौ. कविता मदन कड या भाजीविक्रीचा व्यवसाय करतात. त्या राहत्या ठिकाणचा दुकानाचा गाळा बंद करून यात्रेनिमित्त आपल्या मूळ गावी गेल्या होत्या. दि. ६ फेब्रुवारी २०२६ रोजी पहाटेच्या सुमारास अज्ञात चोरट्यांनी दुकानाचे शटर उचकटून कपाटातील सोन्याचे दागिने लंपास केले होते. याप्रकरणी उत्तर महाळुंगे एमआयडीसी पोलीस ठाण्यात गुन्हा (रजि. नं. १०७/२०२६) दाखल करण्यात आला होता.

### **पोलिसांचा धडाकेबाज तपास आणि कारवाई**

मध्यमवर्गीय कुटुंबातील सोन्याचे दागिने चोरीला गेल्याने पोलीस उप-आयुक्त श्रीमती श्वेता खेडकर यांनी घटनास्थळाची पाहणी करून तपासाचे आदेश दिले होते. वरिष्ठ पोलीस निरीक्षक दिगंबर सूर्यवंशी व सहाय्यक पोलीस निरीक्षक कल्याण घाडगे यांच्या मार्गदर्शनाखाली गुन्हे शोध पथकाने सीसीटीव्ही फुटेज तपासण्यास सुरुवात केली.
तपासादरम्यान पोलीस अंमलदार संतोष काळे व शुभम खंडागळे यांना गोपनीय बातमीदाराद्वारे दोन संशयितांची माहिती मिळाली. त्यांना ताब्यात घेऊन कसून चौकशी केली असता त्यांनी गुन्ह्याची कबुली दिली व मुख्य आरोपी निकू सिंग हा सर्व सोने घेऊन बिहार येथील मूळ गावी पळून गेल्याचे सांगितले.
मुख्य आरोपी निकू सिंग पोलिसांना चकवा देण्यासाठी सतत ठिकाण बदलत होता. त्याने चोरीचे सोने लपवण्यासाठी त्याचा भाऊ रंजन सिंग याची मदत घेतली होती. सलग चार महिने विविध तांत्रिक विश्लेषणाच्या आधारे तपास करत पोलिसांनी **रंजन सिंग याला मुंबई येथून** आणि **निकू सिंग याला बंगळुरू (कर्नाटक) येथून** ताब्यात घेतले.
त्यांच्या सांगण्यावरून पोलीस पथकाने बिहारमधील सीतामढी येथे जाऊन लपवून ठेवलेले **१२,६०,००० रुपयांचे १४ तोळे सोन्याचे दागिने** हस्तगत केले.

### **अटक करण्यात आलेले आरोपी:**

१. **निक्कुकुमार देवकी सिंग** (वय २२, रा. सीतामढी, बिहार)
२. **रंजनकुमार देवकी सिंग** (वय २०, रा. सीतामढी, बिहार)
३. **राजकुमार उर्फ प्रिन्सकुमार विजय पासवान** (वय १९, रा. रोहतास, बिहार)
४. **डिंपल पटेल विनोद सिंग** (वय २६, रा. केमल भबुआ, बिहार)

**पोलीस पथक:**

ही यशस्वी कारवाई पिंपरी-चिंचवडचे पोलीस आयुक्त श्री. विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त श्री. सारंग आव्हाड, अपर पोलीस आयुक्त श्री. बसवराज तेली, पोलीस उप-आयुक्त (परिमंडळ ४) श्रीमती श्वेता खेडकर, व सहाय्यक पोलीस आयुक्त श्रीमती प्रिया डमाळे यांच्या मार्गदर्शनाखाली उत्तर महाळुंगे पोलीस ठाण्याचे वरिष्ठ पोलीस निरीक्षक दिगंबर सूर्यवंशी, सपोनि कल्याण घाडगे व गुन्हे शोध पथकाने केली आहे.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)