## 🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 NEWS EXPRESS 18 | न्यूज एक्सप्रेस १८ विशेष बातमी पत्र 🛑 **वेगाने… अचूक… तुमच्यापर्यंत!**

# मोबाईल चोरीच्या संशयावरून खून करणाऱ्या आरोपीला महाळुंगे पोलिसांनी २४ तासांत ठोकल्या बेड्या!…

क्राईम रिपोर्टर :- परमेश्वर कांबळे

**महाळुंगे (प्रतिनिधी):** मोबाईल चोरी केल्याच्या संशयावरून एका ४२ वर्षीय व्यक्तीचा खून करून फरार झालेल्या आरोपीला दक्षिण महाळुंगे एम.आय.डी.सी. पोलिसांनी अत्यंत शिताफीने अवघ्या २४ तासांच्या आत अटक केली आहे. चाँद याकुब शेख (वय ४२, रा. केशवनगर, चिखली, पुणे) असे खून झालेल्या व्यक्तीचे नाव असून, हिरालाल सुभाषचंद्र गौतम (वय २८, मूळ रा. इटावा, उत्तर प्रदेश) या आरोपीला पोलिसांनी वाघोली परिसरातून ताब्यात घेतले आहे.

### घरात आढळला कुजलेला मृतदेह
पोलिसांनी दिलेल्या माहितीनुसार, दिनांक २ जुलै २०२६ रोजी रात्री १० वाजण्याच्या सुमारास निघोजे-मोई रोडवर, मोई गावच्या हद्दीतील गुरुकृपा हाउसिंग सोसायटीमधील एका बांधकामाधीन घराच्या दुसऱ्या मजल्यावर एक मृतदेह कुजलेल्या अवस्थेत असल्याची माहिती ‘डायल ११२’ वरून पोलिसांना मिळाली. माहिती मिळताच वरिष्ठ पोलीस निरीक्षक आणि तपास पथकाने तातडीने घटनास्थळी धाव घेतली. मृतकाची ओळख पटवली असता, तो चाँद याकुब शेख असल्याचे निष्पन्न झाले. याप्रकरणी मृतकाच्या पत्नी शेजनाज चाँद शेख यांनी दिलेल्या तक्रारीवरून दक्षिण महाळुंगे एमआयडीसी पोलीस ठाण्यात **भारतीय न्याय संहिता (BNS) २०२३ चे कलम १०३ (१)** अन्वये खुनाचा गुन्हा दाखल करण्यात आला.
### संशयाची सुई आणि पोलिसांचा तपास
तपास दरम्यान पोलिसांना समजले की, मयत चाँद शेख हा त्याचा साथीदार हिरालाल गौतम याच्यासोबत राहत होता आणि घटना घडल्यापासून हिरालाल दोन दिवसांपासुन फरार होता. पोलिसांनी तांत्रिक विश्लेषण आणि साक्षीदारांकडून मिळालेल्या माहितीच्या आधारे आरोपीचा शोध सुरू केला. तो वाघोली आणि केसनंद परिसरात लपून बसल्याची खात्रीशीर माहिती मिळताच, तपास पथकाचे पोलीस उपनिरीक्षक संतोष जायभाये आणि त्यांच्या सहकाऱ्यांनी तातडीने तिथे जाऊन सापळा रचला व आरोपीला २४ तासांच्या आत बेड्या ठोकल्या.
### मोबाईलवरून झाला होता वाद
पोलिसी खाक्या दाखवताच आरोपी हिरालाल गौतम याने आपला गुन्हा कबूल केला. २९ जून २०२६ रोजी रात्री १० वाजण्याच्या सुमारास चाँद शेख याने आपला मोबाईल चोरल्याचा संशय हिरालालला होता. याच कारणावरून त्यांच्यात वाद झाला आणि हिरालालने चाँद याला गंभीर मारहाण करून जीवे ठार मारले.
### या पथकाने केली कामगिरी
ही धडक कारवाई पिंपरी चिंचवडचे पोलीस आयुक्त श्री. विनयकुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त (गुन्हे) सारंग आवाड, अपर पोलीस आयुक्त डॉ. बसवराज तेली, पोलीस उप-आयुक्त श्रीमती श्वेता खेडकर आणि सहाय्यक पोलीस आयुक्त श्रीमती प्रिया डमाळे यांच्या मार्गदर्शनाखाली वरिष्ठ पोलीस निरीक्षक विजय ढमाळ, पोलीस निरीक्षक (गुन्हे) अनिल देवडे, पोउपनि संतोष जायभाये, पोलीस अंमलदार चेतन सावंत, नरहरी नाणेकर, युवराज बिराजदार, राजेंद्र खेडकर, राजेंद्र गिरी, प्रशांत कसबे, महेश गायकवाड, आकाश घाडगे आणि शिवाजी मरकड यांच्या पथकाने केली.
या गुन्ह्याचा पुढील तपास पोलीस निरीक्षक (गुन्हे) अनिल देवडे करत आहेत.

📊 **अशाच ताज्या आणि विश्वासार्ह बातम्यांसाठी पाहत राहा, न्यूज एक्सप्रेस १८!**
👉(https://newsexpress18.online)