प्रतिनिधी :- परमेश्वर कांबळे
**पिंपरी-चिंचवड:- दुबई आणि थायलंड येथून आंतरराष्ट्रीय सायबर रॅकेट चालवून भारतीय नागरिकांना कोट्यवधी रुपयांचा गंडा घालणाऱ्या मुख्य आरोपीला अटक करण्यात पिंपरी-चिंचवड पोलिसांच्या सायबर सेलला प्रचंड मोठे यश आले आहे. सौरभ उर्फ गणेश बाळासो काळे असे या आंतरराष्ट्रीय सायबर गुन्हेगाराचे नाव असून, त्याच्याविरुद्ध जारी करण्यात आलेल्या ‘रेड कॉर्नर नोटीस’ (Red Corner Notice) आणि ‘लुकआऊट सर्कुलर’ (LOC) च्या आधारे त्याला बँकॉक (थायलंड) विमानतळावर ताब्यात घेण्यात आले. त्यानंतर सायबर पोलिसांच्या पथकाने त्याला भारतात आणून अधिकृतरीत्या अटक केली आहे.
### तीन मोठ्या गुन्ह्यांचा पर्दाफाश
पिंपरी-चिंचवड आणि परिसरात झालेल्या तीन मोठ्या सायबर गुन्ह्यांच्या तपासादरम्यान या आंतरराष्ट्रीय सिंडिकेटचा पर्दाफाश झाला:
१) **देहूरोड पोलीस ठाणे:** ऑनलाईन टास्क फ्रॉड (Task Scam) फसवणूक.
२) **हिंजवडी पोलीस ठाणे:** शेअर मार्केटमध्ये गुंतवणूक करायला लावून १८ लाख रुपयांची फसवणूक.
३) **सायबर पोलीस ठाणे:** शेअर मार्केटच्या नावाखाली तब्बल २ कोटी ६६ लाख रुपयांची झालेली फसवणूक.
### दुबईतून चालत होते मुख्य कार्यालय; चीनशी कनेक्शन!
देहूरोड पोलीस ठाण्यातील गुन्ह्याचा तपास करताना सायबर पोलिसांनी जून २०२४ मध्ये १३ आरोपींना अटक केली होती. त्यांच्या सखोल चौकशीतून धक्कादायक माहिती समोर आली. अटक केलेला आरोपी दीपक गाडे हा दुबईत जाऊन मुख्य सूत्रधार गणेश काळे याला भेटला होता. गणेश काळे हा भारतातील वेगवेगळ्या व्यक्तींकडून पैशांच्या मोबदल्यात एटीएम, चेकबुक, इंटरनेट बँकिंग आयडी आणि पासवर्डसह ‘म्युएल अकाऊंट्स’ (Mule Accounts) मिळवायचा.
गुन्ह्यातून आलेला पैसा वळवण्यासाठी या बँकिंग खात्यांचा वापर केला जात होता. आरोपी गणेश काळे याने सायबर फसवणुकीचे हे आंतरराष्ट्रीय नेटवर्क हाताळण्यासाठी थेट दुबईत स्वतःचे मुख्य कार्यालय सुरू केले होते. इतकेच नव्हे तर, तो **चीन (China)** आणि इतर परदेशी नागरिकांच्या थेट संपर्कात होता. त्यांच्या मदतीने तो भारतीय नागरिकांना ‘टास्क फ्रॉड’, ‘शेअर मार्केट इन्व्हेस्टमेंट फ्रॉड’ आणि ‘डिजिटल अरेस्ट’ सारख्या क्लृप्त्या वापरून लुटत होता.
### दुबईहून बँकॉकमध्ये पलायन अन् इंटरपोलची मदत
आरोपी गणेश काळेविरुद्ध भक्कम पुरावे मिळाल्यानंतर महाराष्ट्र शासनामार्फत केंद्रीय गृह मंत्रालय (नवी दिल्ली) यांच्याकडे त्याच्या प्रत्यार्पणाचा (Extradition) प्रस्ताव पाठवण्यात आला होता. या प्रस्तावावर २०२४ मध्ये युएई (दुबई) एम्बसी येथे कायदेशीर कारवाई सुरू असतानाच, सप्टेंबर २०२५ मध्ये आरोपी दुबई सोडून बँकॉक (थायलंड) येथे पळून गेला.
सायबर पोलीस पथकाने यानंतरही हार न मानता केंद्रीय गृह मंत्रालयाकडे सातत्याने पाठपुरावा करून आरोपीविरुद्ध इंटरपोलच्या मदतीने **’रेड कॉर्नर नोटीस’** आणि **’लुकआऊट सर्कुलर’** जारी करून घेतले.
### बँकॉक विमानतळावर आवळल्या आवळल्या मुसक्या
आरोपी गणेश काळे हा थायलंडमधून दुसऱ्या देशात पळून जाण्याच्या तयारीत असतानाच, बँकॉक विमानतळावरील सुरक्षा यंत्रणांनी त्याला रेड कॉर्नर नोटीसच्या आधारे ताब्यात घेतले. केंद्रीय गृह मंत्रालयाच्या समन्वयातून त्याला भारतात आणण्यात आले. दिनांक ११ जून २०२६ रोजी मुंबई विमानतळावर सायबर पोलीस ठाण्याचे सपोनि प्रवीण स्वामी, पोलीस हवालदार हेमंत खरात आणि पोलीस शिपाई नितेश बिचेवार यांच्या पथकाने त्याला ताब्यात घेतले. सध्या या गुन्ह्याचा पुढील तपास पोलीस निरीक्षक रविकिरण नाळे करत आहेत.
### इतर राज्यांतील गुन्हे उघडकीस
गणेश काळे याच्या अटकेमुळे केवळ पिंपरी-चिंचवडमधीलच नव्हे, तर इतर राज्यांतील व शहरांतील अनेक मोठे गुन्हे उघडकीस आले आहेत:
* नोडल सायबर पोलीस ठाणे, मुंबई (गु.र.नं. १२/२०२५)
* मालवणी पोलीस ठाणे, मुंबई (गु.र.नं. १३२/२०२४)
* सायबरबाद पोलीस स्टेशन, तेलंगणा राज्य (गु.र.नं. १२९४/२०२४ आणि १५६२/२०२४)
> **मार्गदर्शक व तपास पथक:**
> ही उल्लेखनीय कामगिरी पिंपरी-चिंचवडचे पोलीस आयुक्त विनयकुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, पोलीस उप-आयुक्त (गुन्हे) रोहिदास पवार, तत्कालीन उपायुक्त संदीप डोईफोडे, डॉ. शिवाजी पवार आणि सहाय्यक पोलीस आयुक्त डॉ. विशाल हिरे यांच्या मार्गदर्शनाखाली करण्यात आली.
> कारवाई करणाऱ्या पथकात पोलीस निरीक्षक रविकिरण नाळे, सपोनि प्रवीण स्वामी, पोउपनि सागर पोमण, पोलीस अंमलदार दीपक भोसले, हेमंत खरात, नितेश बिचेवार, अतुल लोखंडे आणि सायबर पोलीस ठाण्याच्या संपूर्ण पथकाचा समावेश आहे.
>
