१० कोटींच्या तांदूळ घोटाळ्यातील मुख्य आरोपी तेलंगणातून अटक

छत्रपती संभाजीनगर ग्रामीण पोलिसांच्या आर्थिक गुन्हे शाखेने १० कोटींच्या तांदूळ घोटाळ्यातील मुख्य आरोपीला तेलंगणातून अटक करण्यात यश मिळवले आहे. जिन्ना व्यंकट रमणा रेड्डी (रा. वेनमपल्ली, जि. पेदापल्ली, तेलंगणा) असे अटक करण्यात आलेल्या आरोपीचे नाव आहे.

करमाड पोलीस ठाण्यात गु.र.क्र. २९४/२०२६ अन्वये भादंवि कलम ४२०, ४०६, ४६५, ४०९, ४६४, ४६८, ४७१, ३४ व १२०(ब) अंतर्गत गुन्हा दाखल आहे. फिर्यादी अशोक दादासाहेब तावरे हे ‘रँडीको’ कंपनीत कार्यरत असून, त्यांच्या कंपनीचा भारतीय अन्न महामंडळ (FCI) सोबत इथेनॉल निर्मितीसाठी ५५,९०८ मेट्रिक टन तांदूळ पुरवठ्याचा करार झाला होता.

करारानुसार कंपनीने FCI च्या खात्यात ११२ कोटी ९९ लाख रुपये भरले होते. मात्र आरोपीने संगनमताने बनावट कागदपत्रे तयार करून प्रत्यक्षात ५००४ मेट्रिक टन तांदूळ न पुरवता पुरवठा केल्याचे भासवले व कंपनीची १० कोटी ११ लाख ३२ हजार ५६२ रुपयांची फसवणूक केली.

गुन्हा दाखल झाल्यानंतर आरोपी दोन वर्षांपासून फरार होता. पोलिसांची पथके तपासासाठी गेली की तो मोबाईल बंद करून हैदराबाद, चेन्नई व तिरुअनंतपुरमसारख्या शहरांत लपून राहत होता.

पोलीस अधीक्षक डॉ. विनयकुमार राठोड यांच्या आदेशानुसार आर्थिक गुन्हे शाखेने आरोपीचा शोध सुरू ठेवला. आरोपी स्वतःच्या गावाचा उपसरपंच असल्याने त्याने गावातील रस्त्यांवर CCTV कॅमेरे बसवून बाहेरील वाहनांवर लक्ष ठेवण्याची व्यवस्था केली होती.

८ मार्च २०२६ रोजी आरोपी ग्रामपंचायत कार्यालयात येणार असल्याची माहिती मिळाल्यानंतर पोलिसांनी ७ मार्च रोजी रात्री गुप्तपणे गावाजवळ पोहोचून स्थानिक वेशात कारवाई करत आरोपीला अटक केली.

या कारवाईत गुन्ह्यात वापरलेली **होंडा सिटी (MH-20-EJ-1314)** कार, किंमत सुमारे ५ लाख रुपये, जप्त करण्यात आली. आरोपीला न्यायालयात हजर केले असता त्याला १४ मार्च २०२६ पर्यंत पोलीस कोठडी सुनावण्यात आली आहे.

ही कारवाई पोलीस अधीक्षक डॉ. विनयकुमार राठोड व अपर पोलीस अधीक्षक अण्णापूर्णा सिंग यांच्या मार्गदर्शनाखाली पोलीस निरीक्षक शामसुंदर कौटाळे, पोउपनि मधूकर मोरे, राम हत्तरगे, पोह. दिपेश नागझरे व जितेंद्र बोरसे यांच्या पथकाने केली. पुढील तपास पोउपनि राम हत्तरगे करत आहेत.