सनय छत्रपती शासन पक्षाचे राष्ट्रीय अध्यक्ष प्रा. नामदेवराव जाधव यांनी पुणे येथील पत्रकार भवनात आयोजित पत्रकार परिषदेत महत्त्वपूर्ण घोषणा.

पुणे :-आगामी महानगरपालिका निवडणुकीत सनय छत्रपती शासन पक्ष आपले शहर करू सिंगापूर या धोरणांतर्गत पुणे महानगरपालिकेच्या सर्व १६५ जागा स्वबळावर लढविणार असून, प्रत्येक शहराचे सिंगापूर करण्याच्या उद्देशाने राज्यातील एकूण २९ महानगरपालिकांच्या निवडणुका स्वबळावर लढविण्यात येणार असल्याची स्पष्ट माहिती प्रा. जाधव यांनी दिली.

यावेळी बोलताना त्यांनी पुणे जिल्ह्यातील वाढत्या प्रदूषणाचा गंभीर मुद्दा उपस्थित केला. सध्या पुणे जिल्ह्याचा हवेचा गुणवत्ता निर्देशांक (AQI) ३१६ इतका धोकादायक स्तरावर पोहोचला असून, सिंगापूरमध्ये तो केवळ १२ ते १५ दरम्यान आहे. या प्रदूषणामुळे पुणे जिल्ह्यातील नागरिकांचे सरासरी आयुर्मान सुमारे २० वर्षांनी घटत असल्याची गंभीर बाब त्यांनी अधोरेखित केली.

शहरात मोठ्या प्रमाणावर सुरू असलेल्या बांधकाम प्रकल्पांमुळे धुळीचे प्रमाण वाढत असून, त्यावर कोणतेही प्रभावी नियंत्रण ठेवले जात नाही. सिंगापूरमध्ये बांधकामांच्या ठिकाणी धूळ व प्रदूषण वाढू नये यासाठी काटेकोर उपाययोजना केल्या जातात; मात्र पुण्यात त्या उपाययोजनांची प्रभावी अंमलबजावणी होत नसल्याची टीका प्रा. जाधव यांनी केली.

आजही पुणे शहराचा विकास पाणी, गटार, रस्ते अशा मूलभूत प्रश्नांपुरताच मर्यादित राहिला असून, त्यामुळे शहराची खरी प्रगती खुंटली आहे. वारंवार तेच चेहरे निवडून दिल्यामुळे नागरिक कंटाळले असून, आजपर्यंत निवडून दिलेल्या लोकप्रतिनिधींनी अपेक्षित विकासकामे केली नसल्याची भावना जनतेमध्ये निर्माण झाली आहे, असेही त्यांनी सांगितले.

सनय छत्रपती शासन पक्षाचे निवडून येणारे उमेदवार पुणे शहराचा नियोजनबद्ध, पारदर्शक आणि सर्वांगीण विकास करतील, अशी ग्वाही प्रा. नामदेवराव जाधव यांनी दिली.

या पत्रकार परिषदेत राहुल मते यांची सनय छत्रपती शासन पक्षाच्या पुणे शहराध्यक्षपदी निवड करण्यात आल्याची घोषणाही करण्यात आली.