मुंबई – पिंपरी-चिंचवड पोलिसांत बदली वाद पुन्हा एकदा चव्हाट्यावर आला आहे. वाकड पोलीस ठाण्याचे वरिष्ठ पोलीस निरीक्षक शत्रुघ्न माळी यांची केवळ आठ महिन्यांच्या कार्यकाळात अचानक बदली करण्यात आल्याने प्रशासकीय वर्तुळात मोठी खळबळ उडाली आहे.
माळी यांच्या विरोधात ना कायदा-सुव्यवस्थेची, ना लोकप्रतिनिधींची, ना जनतेकडून आलेली कोणतीही तक्रार असताना ही बदली करण्यात आल्याने या निर्णयाबाबत सर्वत्र आश्चर्य व्यक्त केले जात आहे.
आयुक्तांच्या आदेशाविरुद्ध MAT मध्ये दाद
महाराष्ट्र राज्याचे पोलीस महासंचालक यांनी सर्वसाधारण बदल्या होईपर्यंत इतर कोणतीही बदली न करण्याचा लेखी आदेश दिलेला असतानाही, पिंपरी-चिंचवडचे पोलीस आयुक्त विनयकुमार चौबे यांनी हा आदेश धाब्यावर बसवून ही बदली केल्याचा आरोप करण्यात आला आहे.
या पार्श्वभूमीवर वरिष्ठ पोलीस निरीक्षक शत्रुघ्न माळी यांनी महाराष्ट्र प्रशासकीय न्यायाधिकरण (MAT), मुंबई येथे दाद मागितली.
न्यायालयाची तीव्र नाराजी, दोन आठवड्यांत अहवाल सादर करण्याचे आदेश
दि. 24 मार्च 2026 रोजी झालेल्या सुनावणीत माननीय न्यायमूर्ती चक्रवर्ती यांनी आयुक्तांकडे माळी यांच्या बदलीचे कारण विचारले. मात्र, त्यांच्या विरोधातील कोणतीही तक्रार किंवा दोष दाखवणारा कागद दाखल करण्यात पोलीस आयुक्तालय अपयशी ठरले.
या निष्क्रीय भूमिकेबद्दल न्यायालयाने नाराजी व्यक्त करत, दोन आठवड्यांत या बदलीचा सविस्तर अहवाल सादर करण्याचे आदेश दिले असून 7 एप्रिल 2026 रोजी पुढील सुनावणी निश्चित करण्यात आली आहे.
बदल्या आणि मुदतवाढीवर न्यायालयाचे प्रश्न
न्यायालयाने सुनावणीत नमूद केले की सुप्रीम कोर्ट, बॉम्बे हायकोर्ट, MAT आणि पोलीस महासंचालक यांच्या आदेशांकडे दुर्लक्ष करून मुदतपूर्व मोठ्या प्रमाणात बदल्या करण्यात आल्याचे गांभीर्याने नोंदवले आहे.
माहितीनुसार, पोलीस आयुक्त चौबे यांचा कार्यकाळ 2024 मध्ये पूर्ण झाला असून, बदली होण्याची शक्यता जाणवताच त्यांनी सुमारे 50 वरिष्ठ निरीक्षक, सहाय्यक निरीक्षक आणि उपनिरीक्षक यांच्या बदल्या केल्याचा आरोप सर्वत्र केला जातो आहे. याबाबत न्यायालयाने सविस्तर माहिती मागवली आहे.
या संदर्भात अॅड. प्रशांत नागरजोगे यांनी पोलीस आयुक्तांना पत्रव्यवहार केल्याचे समजते, ज्यामुळे आयुक्तालयाचे अडचणीत वाढ झाली आहे.
प्रकरण गंभीर, संपूर्ण पोलीस दलाचे लक्ष
हे प्रकरण अत्यंत गंभीर असल्याचे न्यायालयाने स्पष्ट केले आहे. 2024 मध्ये मुदत पूर्ण झाल्यानंतरही आयुक्तांची बदली न होणे आणि इतर अधिकाऱ्यांच्या मुदतीपूर्वीच बदली करण्यात येणे यावर न्यायालयाने गंभीर प्रश्न उपस्थित केले आहेत.
या प्रकरणात वरिष्ठ निरीक्षक शत्रुघ्न माळी यांच्या वतीने अॅड. प्रशांत नागरजोगे काम पाहत असून, 7 एप्रिल 2026 रोजी MAT कोर्टाचा निर्णय काय होतो याकडे संपूर्ण राज्य पोलिसांचे लक्ष लागले आहे.
